Sonntag 10. Oktober 2010

A Hirsch isch no offe, nor miaßmo la augn in die Heache, weil ou kemse ette.

I bin augn in „Hintowold“. Mir Jaga sougn ban „guitn“ Hochsitz obn. Sem isch ols zimlich zuigiwochsn, nor hon i mo affa 20 m hoacha Tonne an Hochsitz gimocht. A poor Äste quer, a poor Tasn drau, an Ost und an Janga zin auglegn und passt. Bin gor a poor mo augn af dei Tonne obo fa dei Hirsch nicht uma. Obo la et noch gem amo kemse schon. Ban inne fohrn zin „Guite“ hot mo do Revierleita a SMS gschickt, dassa af die Gamsn geaht. I hon mo gidenkt i schreib erst zruck bole af do Tonne bin, weil sem hone leicht doweil. Nor binne wo augn gikrackslt af dein Bam. Obm awian ungirichtn. Die Bigse afn Janga und nor hone in Revierleita frisch giontwortn, dasse in Hintowold afn „Guitn“ huck. Steck in Handy ins Brusttaschl und moch mit frein Auge an Blick ume wo die Hirsch meistns abba kem. A krat steht a Stickl ente. Nimm in Gugga: „Mah a storko guito 8enda.“ Soge zi mir stille:“Dein putze!“ Drah die Bigse ume und ziel. Af se steaht no ando ente. In sem hone gilod in bessan sein. „Teifl schiaße afn sem.“ Hinto an Bam ischa Blott hergston. Souge zi miar: „La nicht ibohuddon und außa mitn Fingo fa do Zucke.“ Wol iats ziaga longsom weita. „Richte!“ Ab bisl wegwearts fa mir geahta, nor krochts schon. Mando hots dein inne. Nor hone amo drei Jutza ougilod und bin a poor Minutn om sitzn gibliebn. Nochn Schuss kimb glei a SMS fan Jaga Titz, der grod af an Bodnsitz huckn giwellt hot. „Liega?“, schreiba mo. „Jo ando lieg wo, gonz letz darfa et sein,“ honin hinto gschriebn. Nor seinmo wo ume zin Hirsch. „Mah guit, a Kronen 10a“. Daurts et longe nor kimb do Jaga Albert, wos a do om giwellt hot afn Hirsch gian. I hon wo gsog:“ Ba guit Liacht af an Hirsch schiaßn, nor lieng bleibn woa gston isch und die Jogkollegn frein sich mit an mite, se isch hot schön.“ Homo in Hirsch wo ins Tol ochn und awian Weidmonn`s Heil ungstoaßn.

I hon schon olm in Kopf ghob in nägstn Hiarsch wose schiaß stelle wido au! Nor hone la gimiaßt dron gian af dei Orbat. Mah is auskochn wor wo a Orbat. Zwa volla Toge ausgikocht bis in die Nocht inne. Nor isch is Puzzl erst los gong. Noch do Orbat und Somsta Sunnta a poor Stindlan zuignsitzn, bisz an wido dolad. Ba die Rippn hot mis wo bo vodrossn, obo mit awian Hilfe und guit zuiredn fan Opa Ewald isch ols gong. Ba die Leife isch mos guit gilung und af amo ischa wo wido gston.

A Orbat wors wo a rießiga, obo die Freide bola wido gston isch wor greaßa. Die Orbat tut man sich la amo is Lebn un.

In olla Jaga und Naturfreinde a Weidmonn´s Heil und afs Johr an schian Onblick!

 Bericht: Patrick  Kamelger, Jagdrevier Niederdorf